名古屋女子馬拉松的香港禮服男——呂偉強訪問/AJ

引言:參加名古屋女子馬拉松,相信是不少女跑手的夢想,同時亦是一眾男跑手的夢想(笑)!可惜賽事將男士拒諸門外,男士們只能望門輕嘆。不過,這賽事有個特色,就是在終點由一班穿著「踢死兔」的型男,將完賽的紀念頸鏈頒贈給跑手,這一下子又將男士們的地位提升,成為不可或缺的角色。

相信所有男士都想成為禮服型男(除非唔想),但心目中都認為這是不可能的事。原因有很多,我想主要是:不懂日語、沒有參加渠道、可能要面試、競爭激烈、只供日本人應徵等等。

但當我們查看今年的禮服型男名單中,竟然發現一個香港人的名字——呂偉強(Dennis)!這真是晴天霹靂!呂偉強是何方神聖?為何他可以獲選為禮服型男呢?一番查問之下,我終於聯絡到呂偉強本人了,原來他跑過十五隻馬,更是Sub 3的高手呢!

懷著羨慕又妒忌的心情,捉住他問個究竟,為大家解開這個謎團⋯⋯

AJ: Dennis 你好,首先恭喜你在香港渣打馬拉松做出 sub 3 成績!
Dennis: 多謝!我的成績是 2:57:24。

AJ: 嘩,真係犀利!不過都唔及得可以去名古屋做禮服型男犀利(葡萄)⋯ 可唔可以講吓你幾時有這個念頭呢?
Dennis: 其實上年有朋友去完名古屋跑,就知道有這個環節。心想這是一件好玩有趣的事,如果做到就好啦,所以就開始留意一下有咩渠道可以報名參加。

AJ: 嗯,我都認為係一件好玩有趣的事。咁你一開始係點接觸大會呢?
Dennis: 大概在九月尾左右,我電郵了大會查詢怎樣報名,他們回覆話就快開始報名,到時寄表格給他們就可以了。

AJ: 你識日文?
Dennis: 識少少,電郵主要靠 google translate 幫忙。

AJ: 吓,識少少都得?咁我都得啦!(以上係心諗)咁有冇提及報名資格呢?
Dennis: 有兩樣:第一,要係男性;第二,要笑容燦爛!

AJ: 就係咁簡單?冇話規定只準日本人參與?
Dennis: 完全沒有,就係咁簡單。

AJ: 咁你就寄表格去?填表容易嗎?
Dennis: 係,表格只是一張 A4 紙,但要用日文填寫。除基本資料外,還要寫一段自我介紹,多得日本友人的協助,總算寫出一段像樣的日文。此外,還要附上兩張相片,一遠一近(人像距離),主要睇吓你係點樣,笑容是否燦爛。

AJ: 只是寄表格去就可以?不用進行面試?
Dennis: 不用,到十二月一日就會網上公佈結果。

AJ: 咁兒戲嘅…(又係心諗)嘩!咁簡單嘅,填張表格就得,下年肯定好多人應徵!好啦,到公佈結果的日子,你心情如何呢?
Dennis: 大會話會電郵通知取錄者,但當日我遲遲未收到,咁就自己上網 check 吓啦,睇吓睇吓,去到最後一個,竟然睇到自己個名!那一刻簡直唔敢相信:真係㗎?(確認電郵於當晚收到)

AJ: 嘩,你就好啦!(葡萄中,強作鎮定)咁之後有咩要做呢?
Dennis: 之後大概十二月中,我飛咗過去名古屋試身,大會為我訂做「踢死兔」。其實唔親身去都得,只要你將呎吋給大會就可以了。

AJ: 仲有冇?
Dennis: 冇啦,之後就到賽前的 expo,比賽前日上午到場聽取簡報及上台亮相,最後就係比賽日準時到場,送禮給完賽跑手。

AJ: 原來如此,聽落個過程冇想像中咁複雜。係呢,做禮服型男有冇錢收呢?
Dennis: 冇,不過會送出為你度身訂造的「踢死兔」、Nike 波鞋一對(當日穿著)和當日車馬費上限二千日元。

AJ: 嗯,咁啲應徵者都可能只係為興趣,又或者覺得好玩先會去參與。我估一定好多人應徵啦!
Dennis: 咁又唔算多喎,只係有大約二百五十人應徵。

AJ: 咁真係唔算多喎!(機會嚟啦!)咁你預計到時情況會係點呢?又有咩期望呢?
Dennis: 我估應該會有好多香港跑手搵我攞禮物!同埋希望認識到其他禮服型男。

AJ: 我冇意見,並且呼籲各位香港跑手,一定要同 Dennis 打個招呼,支持我哋港男唯一代表,不要讓日本人專美!最後,你有冇說話想同香港跑手講呢?
Dennis: 希望各位香港跑手努力向著自己的目標進發,享受比賽,盡情玩樂,「Winners never quit, quitter never wins」,共勉之。

後記:根據大會安排,Dennis 將於日本時間下午一點至兩點,在終點後頒贈禮物給跑手;並於三點至四點,在終點前之跑道側邊,為跑手打氣。

型男網頁:http://ikemen.web.co.jp

#名古屋女子馬拉松
#馬拉松看世界
#RunTheWorld
#呂偉強
#AJ
#男神

Advertisements

2 thoughts on “名古屋女子馬拉松的香港禮服男——呂偉強訪問/AJ

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s